શુક્રવાર, 2 જાન્યુઆરી, 2015

મને ગમે છે.

ખરી વાત છે તારી રાધા કે, મને શું ખબર હોય આ પ્રેમની,
                      મને તો બસ દિવસ-રાત ફક્ત તારું જ નામ લેવું ગમે છે.

ખરી વાત છે તારી કે, નથી જાણતો હું કોઈ પ્રેમની વ્યાખ્યા,
                      મને તો બસ માત્ર તારા સુખદુખનો ભાગીદાર થવું ગમે છે.

ખરી વાત છે તારી કે, નથી લાવતો તારા માટે ક્યારેય ફુલ,
                      મને તો બસ તારા રસ્તે પડેલા કાંટાઓ વીણવાનું ગમે છે.

ખરી વાત છે તારી કે, નથી જવા દેતો તને મારાથી દૂર ક્યાય,
                      મને તો બસ તારી મુલાયમ હથેળી પકડીને ચાલવું ગમે છે.

ખરી વાત છે તારી કે, હું બેદરકાર છું સાવ પોતાની જાત પ્રત્યે,
                     મને તો બસ માત્ર તારું ધ્યાન અને સંભાળ રાખવી ગમે છે.

ખરી વાત છે તારી કે, તારા સિવાય પણ બીજી દુનિયા છે અહી,
                      મને તો બસ માત્ર તને જ મારી દુનિયા બનાવવી ગમે છે.

ખરી વાત છે તારી કે, આપણે સાથે રહી શકીએ એ શક્ય નથી,
                      મને તો બસ જિંદગીભર તારી યાદોને સાચવવી ગમે છે.

ગુરુવાર, 1 જાન્યુઆરી, 2015

તું એકવાર માત્ર "હા" બોલી દે.

દુનિયાની પરવા નહિ કર તું, આ દેખાડી દુનિયાનો ભરોસો તું મૂકી દે,
દિલથી એકવાર કર વિશ્વાસ મારા પર, તું એકવાર માત્ર "હા" બોલી દે.

દિલ ફાડીને પ્રેમ કરીશ તને, પણ તું એકવાર આંખથી ઈશારો કરી દે,
બધા નફરતના પહાડોને હું તોડી દઈશ, તું એકવાર માત્ર "હા" બોલી દે.

તારી મુસીબતોને હું હરાવીશ એકલો, તું એકવાર તારી તકલીફ કહી દે,
નહિ પડવા દઉં તારી આંખમાંથી આંસુ, તું એકવાર માત્ર "હા" બોલી દે.

પ્રેમ આવો બીજી વાર નહિ મળે, તારા હૃદયને શાંતિથી ધરપત દઈ દે,
રસ્તો જેટલો દેખાય એટલો કઠોર નથી, તું એકવાર માત્ર "હા" બોલી દે.

કયા ગુનાની સજા આપે છે તારી જાતને, જિંદગીને એકવાર છૂટી મૂકી દે,
આપોઆપ તે પોતાનો રસ્તો શોધી લેશે, તું એકવાર માત્ર "હા" બોલી દે.

તારા વિશ્વાસ અને મારા પ્રેમથી છે એક સંબંધ, એને તું કંઈક નામ દઈ દે,
મારા પ્રેમની મંઝીલ માત્ર તું જ છે, પણ તું એકવાર માત્ર "હા" બોલી દે.

હૃદયમાં પ્રેમ અને હોઠ પર નફરત, આવી રમત તું મારી સાથે રહેવા દે,
મારું પૂરું આયખું વિતાવવું છે તારી સાથે, તું એકવાર માત્ર "હા" બોલી દે.